Sontgets

Sontget a Dieni
In pign sontget sesanflava a Dieni. Duri Battesta Berther da Dieni ha schau construir quel entuorn 1875. Ina crusch fier steva gia avon leu en memoria da Giusep Maria Peder (1790) da Rueras ch’ei vegnius pella veta en in squatsch lavina en Val Giuv sut il Draus ils 23 da matg 1843 cun far nitschuns. – Ina crusch lenn, plazzada en quei sontget, fuva ina memoria da Giachen Fidel Maria Cavegn (*1811) da Rueras, disgraziaus ils 12 da settember 1872 en Val Giuv cun cavar cristallas. Las duas pintgas statuas da s. Giusep e s. Vendelin han Vigeli Giusep Berther (1856-1925) da Dieni e sia sora Maria Turte (1860-1925) tschentau lien. Els han era giu quitau pil manteniment. Il sontget ei svanius igl onn 1974 e quei en connex dall’erecziun d’ina garascha en quei liug.

Sontget a Camischolas

In sontget steva pli da vegl entadem il vitg Camischolas da maun sura. Il num “Prau Sontget” ei restaus tochen al di dad oz. Forsa ha il buf d’ina lavina giud il Pegn dil
Tgapi ruinau el ina gada. Vegnend il stradun sull’Alpsu construius 1862-1864 ei il sontget svanius totalmein. La pintga statua da Nossadunna, che ornava quel, ha statalter Gion Andriu Berther (1805-1887) spindrau e tschentau quella el mir da sia casa a Camischolas.

Sontget dils mats a Gonda

Il sontget dils mats sesanflava sper la punt a Sedrun, giudem la via da Gonda. El representava Niessegner vid la crusch e purtava sin la fatschada l’inscripziun «Ecce Homo». Il sontget ei vegnius baghegiaus 1864 sin sulom, che famiglia Martin Beer, Gonda, ha giu regalau. Da vegl enneu existeva gia in tec pli anora in sontget fatg sin petgas e tabliaus cun aissas. Quel ha denton stuiu ceder vegnend il stradun sull’Alpsu baghegiaus. El ei aunc documentaus igl onn 1837 sin la carta dalla via entras inschignier Salvetti.
Avon onns serimnava la cumpignia da mats avon quei sontget per rugalar mintgamai lur fatschentas, sco per exempel metter capitani, reparter las bandieras per las fiastas ed auter. Il sontget s’udeva alla cumpignia da mats, che ha era baghegiau e manteniu el. Per quei intent vegneva ei priu si mintg’onn la fiasta da Sontgilcrest in’unfrenda denter la cumpignia da mats. 1909 han ins enrihiu el cun in niev garter da fier ed igl onn 1911 renovau el. Pli daditg vegnev’ei era schau arder ils davos dis dalla jamna sontga ina glisch en quei sontget. En connex cun il slargiament dil stradun e l’erecziun dalla via da Gonda ha il stradun stuiu ceder allas relaziuns modernas da traffic.

Il sontget dils Gedius a Sedrun

Il sontget cuntegn quater figuras da lenn en grondezia naturala: Jesus, Maria e dus Gedius. Ellas representan la quarta staziun dalla via dalla crusch.
Historia
Oz buca pli, mo pli da vegl sesanflava il sontget tut isolaus dador il vitg da Sedrun spel stradun viers Mustér. Il vitg ei carschius ed il sontget ei oz ina part da quel.
1835
La historia da quel entscheiva el 19avel tschentaner, exactamein cugl onn 1835. Quei onn han statalter Gion Antoni Curschellas da Bugnei e Sep Antoni Caviezel da Sedrun fatg in pelegrinadi a Nossadunnaun. In pelegrinadi che vegneva frequentaus stediamein dalla part sura dalla Cadi e che menava sul Pass la Crusch. Mond els dus sur il Hacken el Cantun Sviz, vesan ed admiran els in sontget cun la quarta staziun dalla via dalla crusch. Quel, e forsa era gl’entir pelegrinadi e la ferma religiun, han fatg impressiun sin els dus ed els han priu la decisiun d’ereger in semegliont en Tujetsch, a Sedrun.
1836
Stai anavos han els anflau en Gion Battesta Andreoli il dretg sculptur e tarmess quel en quei liug per studegiar las sculpturas e surdau ad el la lavur d’entagliar enzatgei semegliont. Denton ei Sep Antoni Caviezel morts e Gion Antoni Curschellas ha baghegiau e pagau tut persuls il sontget ed igl intent ei staus quel da far ina buna caussa.
Las statuas ha pia Gion Battesta Andreoli da Mustèr entagliau. La lenna persuenter ha el pinau a Carerra, visavi Disla. Il Placi Francestg Schmed da Faltscharidas ha gidau a tagliar il da grob culla sigir aulta, ferton che Andreoli cumandava. Il gediu pign ha il meisterentagliader tagliau ora tenor ina dunna da Funs, numnada la Buscha. Il gediu grond ei fatgs suenter la figura dil sura Placi Francestg Schmed. Finida la lavur, ein las figuras vegnidas transportadas a Sedrun. Ellas ein vegnidas tschentadas en casa pervenda. Quella stiva ei persuenter adina vegnida numnada la stiva dils gedius.
1837
Venderdis sogn digl onn 1837 ei vegniu arranschau ina processiun. Las statuas ein vegnidas transportadas naven dalla casa pervenda tiel sontget.
1923
Pli tard ha Tumaisch Curschellas, sutnevs dil sura Gion Antoni Curschellas, giu quitau dil sontget e cun 1923 han frars Soliva dil mulin a Gonda surpriu il manteniment dil sontget.
1925
Il sontget fuva fetg pigns e consisteva mo ord il chor dad oz. Perquei eis el vegnius engrondius igl onn 1925 e dapi lu dattan entgins bauns al visitader la pusseivladad da seprofundar en oraziun. Il tetg da slondas ei vegnius remplazzaus cun stuors. Da lu naven ornescha era in pign clutgeret cun in zenn il sontget. Sur l’entrada ei in maletg che muossa Jesus suenter la mort vid la crusch.
Dumengia da palmas vegn la palma benedida avon il sontget dils gedius. Silsuenter suonda la processiun alla baselgia parochiala.
1928
Ils 24 da settember 1928 ha il sontget retschiert in niev zenn culla peisa da 35 kilos, cul tun cis e culaus dalla firma H.Rüetschi, Aarau. Il zenn ha custau en tut “fix und fertig montiert und zum Läuten eingerichtet” 371 frs. Quella summa ha dunna Onna Roman-Huonder, domiciliada a Mustér pagau. Il zenn porta l’inscripziun: S.Anna, roga per nus 1928. Il tun cis dil niev zenn ei vegnius eligius, sinaquei ch’el corrispundi cul tuchiez da Sedrun. Maria Onna Roman-Huonder, la benefactura, habitava pli daditg cun ses geniturs a Sedrun ella casa gest sper il sontget e sco vischina ed engrazieivla a Tujetsch, ha ella pagau quei zenn.
La damaun dils 24 da settember 1928 ha plevon sur Giachen Antoni Fetz, en preschientscha dalla famiglia Soliva, possessura dil sontget, benediu il zenn ch’era ornaus cun in tschupi e quei tut tgeuamein. Silsuenter ha il montader fatg sia lavur.
1999
Tochen igl onn 1999 han Pieder Deflorin e Testi Soliva giu quitau pil manteniment dil sontget e cun quei onn surpren la Pleiv Tujetsch la tgira dil custeivel sanctuari.
2005
El decuors dils onns 2004/05 vegnan ils mirs sanai ed avon caplutta vegn il plaz cuvretgs cun crappa tagliada.
2006
Las statuas fuvan era vegnidas veglias ed il temps veva sgurdinau vid la colur. Plinavon eran ellas zacu vegnidas coluradas a moda fetg cunvenziunala. L’artista taliana Romina De Virgilis ha igl onn 2006 surpriu il pensum da restauraziun ed ha fatg buna lavur cun restaurar las statuas al stan original.

Il sontget da Sontg’Antoni a Foppas/Surrein

Il sontget sesanfla a Foppas el liug dall’anteriura caplutta da s.Antoni. Muort prighel da bova ei quella vegnida dislocada igl onn 1927.
Sin iniziativa da Battesta Soliva-Cavegn (1882- 1957) vegn eregiu igl onn 1946 il sontget da sontg’Antoni. El fa quei ord motivs fetg persunals, clamond en agid s.Antoni d’urbir ora sanadad a sia dunna. Ils 13 da zercaldur 1947, igl usitau di dalla processiun da s.Antoni, ei il caplut vegnius benedius. Ina statua da s.Antoni cugl affon Jesus ornescha la capluttetta. Il quitau pil sanctuari ei vegnius surdaus agl ugau dalla caplutta da s.Antoni.
….
Sontget da Nossadunna dallas dolurs a Cavorgia
Amiez il vitg da Cavorgia stat quei sontget. Quel ha ina famiglia Jacomet baghegiau circa alla fin dil 18avel tschentaner. Sco la tradiziun raquenta ord il suandont motiv: Quella famiglia haveva giu dus affons morts senza batten e lu empermess da baghegiar in sontget cun ina statua da Nossadunna dallas dolurs. Silsuenter seigien ils affons buca pli morts ed arrivai tier il s. batten.
….
Caplutta svanida

Caplutta a Flurin Sura
In document dils 10 da november 1368, renovaus ufficialmein igl 1. da zercladur 1664
ed ils 28 da november 1834, tracta ina dispeta denter vischins da Flurin Sura, Flurin Sut e Camischolas Sura pervia da dretgs vid l’aua da Londadusa. Entras questa scartira eis ei vegniu renconuschiu e decidiu, che tala aua hagi da cuorer a Flurin Sura «dadora la baselgia giu» ed hagi da survir allas casas ton a Flurin Sura, sco a Flurin Sut.
Ord tala decisiun san ins concluder, ch’ei existevi pli baul ina caplutta a Flurin Sura, dalla quala ins ha denton anflau entochen oz negins fastitgs e ch’ins sa era buc a tgei sogn ni sontga ella fuva dedicada.

Sco PDF