Caplutta s.Antoni Surrein

Surrein vegn da ‘sul Rein’. L’ucliva da Foppas s’auda era tier Surrein. Pli baul fuvan era Nacla, Sax e Canadal habitai. S. Antoni ei il patrun dalla caplutta ch’ei vegnida dislocada 1927 giu da Foppas el liug actual, gest amiez denter las duas parts dil vitg.

1679
Entras la brev dils 11 da november 1679 han ils vischins da Surrein obteniu digl uestg Duri VI de Mont la lubientscha da baghegiar ina caplutta en honur da s. Antoni da Padua.
Igl altar principal deriva dal temps dalla erecziun dil sanctuari.
Enamiez ei il maletg da 1948 che representa s. Antoni duront siu priedi miraculus als peschs. Dretg da quel ina statua da s. Placi e da l’auter maun s. Francestg. Suren stat ina statua da Nossadunna. Sigl antipendi ina figura da reliev digl evangelist Lucas.

1683
Ils vischins da Surrein, Foppas e Nacla s’obligheschan visavi igl uestg, entras ina brev dils 10 da zercladur, da mantener la caplutta.
Ils 20 da zercladur ei la caplutta vegnida consecrada cun mo in altar entras uestg Duri de Mont, Cuera.

1700
Ils dus altars laterals ein semeglionts agl altar grond ed ein vegni tschentai si entuorn igl onn 1700. Dretg ornescha in maletg da s.Giusep, signaus: Johann Sepp, Maler, suren secatta in maletg che representa s.Flurin. Igl altar seniester ei decoraus cun in maletg da Nossadunna cugl affon, s.Giachen e s. Gion evanangelist, suren s. Gieri e s. Barla.

1754
Da quei onn datescha in urbari dalla caplutta da s. Antoni.

1775
Il zenn grond ha in diameter da 50 cm; tun: gis’; peisa ca. 80 kg e porta l’inscripziun: AVE MARIA GRATIA PLENA DOMINUS TECUM A. B. B. (Anton Brandenberg) ZUG ANNO 1775
Maletgs: Nossadunna, s. Antoni da Padua e s. Roc.
Il secund zenn ei d’in diameter da 47 cm; tun: ais’; peisa: ca. 70 kg porta negina inscripziun.Ils maletgs muossan s. Antoni da Padua e la crucifigaziun.

1906
La caplutta ei vegnida renovada dadens e dadora ed ha aunc survegniu vitier in pierti cun aissas, sco schurmetg per l’entrada.

1917
Il tetg dalla caplutta ei vegnius cuvretgs cun plattas dil Valleis.

1927
L’actuala caplutta ei vegnida baghegiada quei onn. Tochen gliez onn sesanflava ella si Foppas. Oz anflein nus leu in pign sontget en honur da s. Antoni. Ins ha stuiu transloccar la caplutta muort prighel da bova. Il terren era periclitaus da sbuar a Rein. Il Run furiava vehementamein e directamein ella costa dil Tgom e magliava ora terren. Ils altars ein restai ils veders.

1947
Restauraziun dils altars entras la firma Stöckli da Stans

1948
Igl altar grond ha obteniu in niev maletg digl artist pictur Wanner. El muossa s. Antoni duront il priedi miraculus als pèschs.

1960
Novas finiastras culs uoppens dils donaturs.

1982
A S. Antoni vegn celebrau il survetsch divin mintga tschun jamnas ed il di da s. Antoni, ils 13 da zercladur.

1985
Damai ch’il tetg fuva bravamein taccaus dalla ruina eis el vegnius coluraus da niev.

1987
Nova illuminaziun.

1995
Colurau tuttas fatschadas exteriuras.
Era il Sontget si Foppas ei vegnius remediaus e coluraus quei onn.

2000
Niev scaldament electric.
Dapi decennis steva la crusch dil clutger crutsch; quei ei vegniu midau entras ina curaschusa acziun.

Sco PDF