Actual

Radunonza dalla Pleiv Tujetsch
Cuorta informaziun
Legreivlamein ein 32 persunas stadas presentas alla radunonza dils 14 d’avrel 2026. Denter las parochianas ed ils parochians san ils responsabels era beneventar nossa collaboratura regiunala, dunna Rilana Cadruvi, las copresidentas dil Cussegl pastoral, il responsabel dalla gruppa liturgica Marcus Munsch e nies emploiau Tarcisi Monn, Rueras, sper biaras autras persunas che s’engaschan ni ein s’engaschadas per la pleiv. El decuors dalla sera retscheivan muort abdicaziun pliras persunas engraziament per lur activitad ed engaschi el ravugl dalla pleiv, aschia ein quei: Lucia Giossi, Imelda Monn, Roswitha Monn, Magrith Cavegn e Richard Cavegn. Gest en quest liug s’auda in engraziament a tuttas persunas ch’ein el decuors digl onn 2025 s’engaschadas pil beinstar dalla pastoraziun ella val.

Protocol e rapports annuals ein vegni approbai senza damondas ed objecziuns. Medemamein era il quen dalla pleiv sco publicaus el rapport 2025. Il preventiv per 2026 ei vegnius confirmaus ed il pei da taglia resta sco vinavon sin 15% dalla taglia sempla cantunala.
Suenter in onn vacanza d’ina persuna en suprastonza han ils presents elegiu per quella da niev dunna Rezia Giger, Selva. Cordiala gratulaziun. Il cussegl pastoral dumbra actualmein mo pli ina suletta persuna. La damonda co vinavon resta aviarta. Dunna Rilana Cadruvi s’exprima en caussa. Sias ponderaziuns van en direcziun d’in cussegl pastoral regiunal cun representants da tuttas treis pleivs. Las singulas pleivs sappien funcziunar cun structuras da gruppas pastoralas activas en differents secturs ella pleiv. Il cussegl pastoral regiunal corrispunda ad in parlament da 5–7 persunas che activeschan en favur dalla regiun, sco era dallas treis pleivs differents eveniments pastorals per tuttas spartas da vegliadetgna. Pil cussegl pastoral Tujetsch crodan neginas propostas ed era buca ideas pigl avegnir ord il miez dils presents. La suprastonza emprova d’anflar sligiaziuns.
Sut varia orientescha il cassier ils presents davart la situaziun actuala ella Pleiv Tujetsch.
Ils presents laian sentir gronda cuntentientscha davart la hodierna radunonza e serendan a casa plein speronza per in bien avegnir dalla pleiv.
Igl actuar
Protocol dalla radunonza da pleiv dils 14 d’avrel 2025

Instrucziun religiusa
Nossa sfida actuala ei d’anflar ina catecheta ni in catechet per l’instrucziun da nos affons pigl onn da scola 2026/27. Forsa sa quella situaziun era animar enzatgi da sescolar sco persuna d’instrucziun religiusa.

Survetschs divins 2026
En sia emprema seduta dalla Regiun pastorala Sursassiala ensemen culs responsabels dalla pastoraziun ei la planisaziun pils survetschs divins per 2026 vegnida organisada. Cun sur Mathew Kurian, plevon da Mustér, cun sur Alexi Manetsch, cun sur Giusep Venzin, cun paders dalla claustra e cun la gruppa liturgica ei la pastoraziun garantida per l’emprema mesadad digl onn 2026.