Baselgia s.Vigeli

La baselgia sesanfla agl ur dil vitg e survescha sco baselgia principala dalla val. Dapi sia erecziun eis ella stada ina baselgia dalla val. Quei fatg documentescha era il santeri che sesanfla giusut il sanctuari, il sulet santeri per l’entira vallada.
La baselgia ei dedicada a sogn Vigeli, uestg da Trient, che ha viviu el quart tschentaner e che ha cristianisau grondas parts dallas valladas el nord dall’Italia.

Igl onn 1205 ei l’emprema baselgia en Tujetsch, a Sedrun, vegnida consecrada. Quei fatg ei documentaus egl urbari da 1456. La baselgia dad oz ei vegnida erigida ils onns 1691/95. 1703 ein ils altars vegni terminai e consecrai. La baselgia impona entras sias excellentas proporziuns ed oravontut entras ses altars dil temps baroc. Quels altars derivan dil luvratori da Johannes Ritz, Selkingen, Valleis. Igl altar grond ei ina preziusa ovra dil ‘meister’ sez, ils dus altars laterals ovras da ses dus fegls.
Il clutger da 42 meters ei aunc pli vegls. Avon il 17avel tschentaner sesanflava la baselgia numnadamein el vest da quei clutger. Pervia dil Run han ins la finala baghegiau la baselgia da 1691 egl ost dil clutger. Dil reminent ei la baselgia la pli aulta baselgia baroca dil Grischun en in vitg!

Dapli mira: Sogn Vigeli