Caplutta s.Leci Cavorgia

Il secund uclaun da vart dretga dalla val ei Cavorgia. El ei il vitg il pli bass situau da l’entira val. El Plaun S. Leci sesanfla la caplutta dedicada al sogn numnau. Da Cavorgia anora meina ina biala via da spassegiar si sur Stagias ella Val Medel ni giu Mompé Medel.

1609
Gl’emprem mussament d’existenza dalla caplutta da s. Leci a Cavorgia ei il zenn pign che porta l’annada 1609. El ha in diameter da 32 cm; tun: g’; peisa: ca. 31 kg e porta l’inscripziun:
AVE MARIA GRATIA PLENA DOMINUS TECUM – 1609
Cullader: nunenconuschent
Maletgs: dus relievs rodunds semeglionts a muneida.
Il zenn grond ha in diameter da 40 cm; tun f’; peisa: ca. 60 kg e porta negin datum ed ei segiramein era buca aschi vegls sco il pign; cullader nunenconuschent. L’inscripziun secloma:
S.LUCI FLORINE ORATE PRO NOBIS Maletgs: s. Giachen e s. Gion evangelist.

1643
La caplutta vegn numnada el cudisch da visitaziun.

1658
Ils 8 da settember ei la caplutta vegnida consecrada en honur da s. Leci e Carlo Borromeo e quei probabel suenter ina pli vasta renovaziun,.

1720
Igl altar ei concepius en ina construcziun ualti gustusa, embellius cun pilasters ed ornaus cun entagls dil temps da rococo.
Da mintga vart dil maletg las statuas da s. Leci dil maun dretg e s. Giusep seniester. Quellas ein postadas sin consolas ed encorunadas cun in baldachin, semeglionts ad in parisol. Las statuas sesanflan denton buca directamein sut quels. Quei lai sminar che las sculpturas dils dus sogns seigien vegnidas tschentadas pli tard sigl altar. Il maletg representa la crucifigaziun, Nossadunna, s. Gion, s. Leci e s. Carli Borromeo. Suren ei in maletg cul s. Bab.

Per dapli informaziuns: Caplutta sogn Leci Cavorgia