Caplutta s.Clau Tschamut

Tschamut ei il vitg il pli el vest dil cantun Grischun. Quella part il pli sisum dalla Val Tujetsch ei vegnida colonisada ed urbarisada da Gualsers neu dalla Val d’Ursera. Il num Z’mut ‘sil crest’ dat perdetga. Entras la claustra da Mustér han ils habitonts da Tschamut retschiert il privilegi d’ina atgna alp, l’Alp Tschamut. Pér igl onn 1866, suenter tractativas liungas e stentusas, ein ils da Tschamut s’uni cull’ulteriura vallada. La caplutta dil 15avel tschentaner ei dedicada a s. Clau ed ei stada ditg ina caplutta da hospezi. D’ina bellezia singulara ein ils entagls ed ornaments el plantschiu sura dalla caplutta.

1500
La caplutta da s. Clau ei vegnida baghegiada entuorn 1500. Probabel ha la claustra da Mustér erigiu quella, havend ella leu ed el contuorn differents beins ed alps. Il clutger ei construius osum il gebel ed ei aschia semeglionts cun quels sin auters hospezis.
Il zenn grond ha in diameter da 55.2 cm; tun: gis’; peisa: ca. 110 kg e porta l’inscripziun: SCTA MA(R)IA S. NICOLAUS – SPTE UNS – LUCAS – MARCUS – MATEUS – IO – HANNES, culaus entuorn 1500.
Fetg interessants e custeivels ei il plantschiu sura dalla caplutta. El ei construius alla fin dalla epoca gotica. El centrum ei postau ina cumplicada rosetta tagliada ora en fuorma da squamas da pèschs. Quella ei circumdada d’ornaments dad uoppens e carteivlamein nodas-casa. Enconuschent ei sulettamein igl uoppen dalla Ligia Grischa – tut igl auter ei forsa era mo decoraziun.

Seniester ella nav ei vid la preit ina statua da s.Clau. Quella deriva ord in luvratori digl Allgäu ed ei d’entuorn 1500. Ella ei vegnida renovada e cumpletada da niev cun gnefla e stab igl onn 1933.

1550
Tiella renovaziun da 1933 ei vegniu discuvretg plirs maletgs. Dretg digl arviul in sogn cun manti brin e calisch, carteivel s. Gion evangelist. Ord la mesadad dil 16avel tschentaner. Seniester:
El chor secattan quater maletgs che representan quater scenas ord la veta da s.Clau.
1. S. Clau schenghegia la dota da spusa allas treis feglias.
2. S. Clau spendra la veta als treis prencis condemnai.
3. Appariziun da s.Clau duront il viadi a Myra.
4. In maletg votiv: ei setracta cheu da dus umens che scatschan, cun agid da s.Clau, guerriers a cavagl.
Dil medem pictur ein era ils maletgs da s.Carlo Borromeo e s.Paul vid la preit viers miezdi.
……

Dapli informaziuns historicas dalla: Caplutta da s. Clau a Tschamut