Actual

INVITAZIUN
alla radunonza generala ordinaria dalla Pleiv Tujetsch
mardis, ils 14 d’avrel 2026 allas 19.00
en sala Cristalla en Halla da sport e cultura Dulezi a Sedrun
Tractandas
1. Avertura e beinvegni
2. Elecziun dad in/a dumbravuschs
3. Approbaziun dil protocol dalla radunonza generala dils 11 d’avrel 2025
4. Rapport annual dalla pleiv
5. Rapport annual dil Cussegl pastoral
6. Rendaquen, rapport dils revisurs ed approbaziun dil quen 2025
7. Approbaziun dil preventiv 2026
8. Fixar il pei da taglia 2026
9. Elecziuns
a) commember/bra en suprastonza
b) pliras persunas el cussegl pastoral
10. Orientaziuns
a)  orientaziuns dil Cussegl pastoral
b)  informaziuns generalas
11. Varia

La suprastonza dalla pleiv envida tuttas parochianas e tuts parochians alla radunonza generala dalla pleiv. Ei legrass nus zun fetg d’astgar beneventar in grond diember alla radunonza.
igl actuar                                                                               il cassier
Tarcisi Hendry                                                                      Primus Deragisch

Commember/ra en la suprastonza dalla pleiv
Ils actuals responsabels enqueran per immediat ni sil pli tard a caschun dalla radunonza dalla pleiv, ils 14 d’avrel 2026, ina tiraza persuna (buca president/a) ella suprastonza dalla pleiv. Ei dess in ver levgiament als responsabels actuals da saver reparter la lavur actuala sin treis dels. Bugen prendein nus cun plascher encunter Tia annunzia.

Instrucziun religiusa
Aunc adina essan nus dalla suprastonza alla tscherca d’ina persuna per l’instrucziun religiusa da nos affons e quei deplorablamein senza success. Sin quella via encurrin nus persunas per quella instrucziun, mo era persunas che fussen promtas da sescolar sco persuna d’instrucziun religiusa.

Info dils 5-12-2025
Ministrantas e ministrants dalla Pleiv Tujetsch
Nossas ministrantas e nos ministrants vegnan susteni ed accumpignai da dunna Rezia Giger da Selva dapi l’entschatta november 2024. Era l’organisaziun e planisaziun succeda entras ella. Sur Mathew sustegn sia lavur ed ei, sco nus tuts engrazievels pigl engaschemnt da Rezia Giger, denton era pigl engaschi e la  beinvulientscha dallas ministrantas e ministrans da far quei survetsch alla pleiv. Giuvens carstgauns el survetsch dalla baselgia ein daventai scarts e gest perquei schazegein nus ferventamein igl engaschi da survir messa. Per suttastrihar e renumerar lur lavur, ha la suprastonza da pleiv cumprau novs vestgius da survir messa. Dumengia, ils 14 da december 2025 avon survetsch divin, ha sur Mathew benediu ils novs vestgius. Quels vegnan lu per la fiasta Nadal a dar pareta e festivitad speciala.

Nova stalla da Nadal
Avon in ferm quart tschentaner, igl onn 1998, ha la baselgia da s.Vigeli retschiert ina nova stalla da Nadal. Per Nadal 2025 ha nies emploiau e caluster construiu ina stalla nova. Las figuras restan secapescha sco vidavon. Nus giavischein niev palscher cun la nova e che quella possi purtar en mintga cor la vera historia da Nadal – la naschientscha digl affon Jesus.

Survetschs divins 2026
En sia emprema seduta dalla Regiun pastorala Sursassiala ensemen culs responsabels dalla pastoraziun ei la planisaziun pils survetschs divins per 2026 vegnida organisada. Cun sur Mathew Kurian, plevon da Mustér, cun sur Alexi Manetsch, cun sur Giusep Venzin, cun paders dalla claustra e cun la gruppa liturgica ei la pastoraziun garantida per l’emprema mesadad digl onn 2026. Nossa sfida actuala ei d’anflar ina catecheta ni in catechet per l’instrucziun da nos affons pigl onn da scola 2026/27. Forsa sa quella situaziun era animar enzatgi da sescolar sco persuna d’instrucziun religiusa.

Radunonza dalla pleiv
La radunonza dalla Pleiv Tujetsch pigl onn da gestiun 2025 ha liug, mardis, ils 14 d’avrel 2026, allas 19:00 en sala Cristalla en Halla da sport e cultura Dulezi. Actualmein maunca aunc adina in/a president/a dalla pleiv. Da nossa vart vein nus plidentau pliras persunas. Forsa las fallidas, aschia che nus savein aunc far negina proposta per ina elecziun. Bugen spitgein nus era da nossa gronda cuminonza propostas ni persunas che seporschan per quei uffeci.

Engraziaments e giavischs
Sche nus stein ussa alla fin digl onn, mirein nus cun engrazieivladad anavos sin ina pleiv che viva e basegna cuminonza. Bia sentupadas han possibilitau inscunters denter parochianas e parochians cun bia muments prezius che han enrihiu tgierp ed olma.

In cordial engraziament va a tut quels ed a tut quellas ch’ein s’engaschai gl’onn passont en nossa pleiv, alla pastoraziun, a voluntarias ed a voluntaris, a collaboraturas e collaboraturs, allas persunas che portan responsabladad els differens gremiums, al caluster, agl organist, a cantadurs e cantaduras cun lur dirigents, alla musica ed alla giuventetgna, a nies catechet ed a biars auters che han gidau cun grond engaschament pil reussir da nossa veta ecclesiastica.
Engraziament era a tut quels che fan viva nossa pleiv cun lur fideivladad, cun lur sustegn ed oraziun. Mintga sentupada, mintga maun gidont e mintga plaid ei ina preziusa contribuziun per nossa cuminonza.
Nus giavischein a Vus tuts dis da Nadal benedi, muments da quietezia e reflexiun sco era in onn niev plein speronza.
En num da la suprastanza da la pleiv
ils actuals administraturs